Nagsagawa ng pagdinig ang Committee on Transportation and Communication ng Sangguniang Bayan ng Bayambang kaugnay ng kahilingan para sa appointment at dayalogo hinggil sa ipinatutupad na “salang arrangement” sa mga terminal ng apat na transport groups sa bayan.
Pinangunahan ni Councilor Zerex T. Terrado, Chairman ng Committee on Transportation and Communication, ang pagpupulong na dinaluhan ng mga kinatawan ng lokal na pamahalaan, Bayambang Police Station, at iba pang concerned offices upang pag-usapan ang mga isyung may kinalaman sa sistema ng pagsasalang ng mga pampasaherong sasakyan sa mga terminal ng Bamacada, Baymaldag, New Bayambang ETC, at Baymacada.
Sa pagdinig, inilahad ng mga kinatawan ng transport groups ang kani-kanilang mga saloobin, obserbasyon, at mungkahi upang mapanatili ang kaayusan at patas na operasyon sa mga terminal. Tinalakay rin ang mga umiiral na alituntunin at ang mga posibleng hakbang upang maiwasan ang hindi pagkakaunawaan at mapabuti ang serbisyo sa mga mananakay.
Nagbigay naman ng kanilang mga pananaw at rekomendasyon ang Bayambang Public Safety Office (BPSO) sa pamamagitan ni BPSO Deputy Officer, 1Lt Amory M. Junio at Bayambang Municipal Police Station Chief, PLtCol Rommel P. Bagsic. Binigyang-diin nila ang kahalagahan ng maayos na koordinasyon ng lahat ng sektor upang matiyak ang kapayapaan, kaligtasan, at maayos na daloy ng transportasyon sa bayan.
Naging mabunga ang talakayan at nagbukas ng pagkakataon para sa mas malalim na pag-uusap sa pagitan ng mga transport groups at ng lokal na pamahalaan. Inaasahang magsisilbing gabay ang mga rekomendasyong nabuo sa pagdinig sa pagbalangkas ng mga angkop na hakbang at polisiya para sa kapakanan ng mga transport operators, drayber, at ng riding public ng Bayambang. (RSO; photos by SB)
