Muling pinatunayan ng Department of Health (DOH) ang patuloy nitong malasakit at dedikasyon sa pagtiyak ng kalidad ng serbisyong pangkalusugan sa publiko sa pamamagitan ng isinagawang taunang surveillance inspection ng Regulatory, Licensing and Enforcement Division (RLED) sa Rural Health Unit (RHU) 1 Birthing Facility at Clinical Laboratory noong Mayo 12, 2026.
Pinangunahan ni Engr. Roberto Tapangco ang inspection team, kasama ang mga health inspectors na sina Azell Aberin, Kaiza Badua, at Charimaine Cariaso. Masusing sinuri ng grupo ang pasilidad upang tiyakin ang mahigpit na pagsunod nito sa mga alituntunin at pamantayang itinakda ng DOH.
Saklaw ng taunang inspeksyon ang iba’t ibang aspeto ng operasyon ng pasilidad, kabilang ang kahandaan sa pagtanggap ng mga pasyente, kaligtasan ng mga ito, wastong pamamahala ng mga rekord, kalinisan ng kapaligiran, functionality ng mga kagamitan, infection prevention and control, at pagsunod sa mga regulasyon para sa laboratoryo at birthing facility. Layunin nitong matiyak na ang RHU 1 ay patuloy na nakapagbibigay ng ligtas at dekalidad na serbisyong pangkalusugan sa komunidad.
Mainit namang tinanggap ng Municipal Health Officer na si Dr. Paz F. Vallo, kasama ang mga kawani ng RHU 1, ang inspection team. Ipinakita ng kanilang kooperasyon na higit pa sa pagsunod sa regulasyon ang layunin ng pasilidad—ito ay patunay ng kanilang patuloy na dedikasyon sa serbisyong pangkalusugan at hangaring mapabuti pa ang kanilang operasyon.
Matapos ang pagsusuri sa Clinical Laboratory at Birthing Facility, lumabas na ganap na sumusunod ang pasilidad sa mga pamantayan ng Department of Health. Ikinalugod ng DOH RLED team ang mataas na antas ng pagsunod ng RHU 1, lalo na sa pagpapanatili ng kaligtasan ng mga pasyente at kalidad ng serbisyong medikal.
Ang matagumpay na resulta ng evaluasyon ay patunay ng patuloy na pagsisikap ng RHU 1 na magbigay ng mahusay na serbisyong pangkalusugan. Ipinapakita rin nito ang matibay na ugnayan ng DOH at RHU 1 sa layuning mas mapabuti pa ang healthcare delivery sa komunidad—isang patunay na sa pamamagitan ng kooperasyon at pananagutan, naisasakatuparan ang mas ligtas at mas maaasahang serbisyong pangkalusugan para sa lahat. (MDPG/RSO; RHU I)
