Upang mas mapahusay ang kakayahan ng mga empleyado ng lokal na pamahalaan, idinaos ang “Strategic Presentation & Influence Training-Workshop” ngayong araw, ika-27 ng Agosto, 2025, sa Balon Bayambang Events Center.
Ang nasabing pagsasanay ay inorganisa ng Human Resource Management Office (HRMO) sa ilalim ng pamumuno ni HRMO Head Nora R. Zafra.
Layunin nitong bigyan ang mga kalahok ng mga kasanayan at estratehiya upang maging mas epektibo sa kanilang mga presentasyon at sa pag-impluwensya sa positibong paraan.
Dumalo sa nasabing pagsasanay si BPC President, Dr. Rafael Saygo bilang kinatawan ni Municipal Administrator Atty. Rodelynn Rajini Sagarino-Vidad na nagbigay ng pambungad na mensahe.
Bilang resource speaker, inimbitahan si Dr. Sharon F. Sanchez, isang Master Teacher I mula sa Bayambang National High School. Ibinahagi niya ang kanyang mga kaalaman at karanasan sa strategic communication, public speaking, at interpersonal skills.
Ayon kay Gng. Zafra, ang training-workshop na ito ay bahagi ng kanilang commitment sa patuloy na pagpapaunlad ng kapasidad ng mga empleyado. “Naniniwala kami na sa pamamagitan ng mga ganitong pagsasanay, mas magiging handa at epektibo ang ating mga kawani sa paglilingkod sa ating mga kababayan,” pahayag niya.
Dagdag pa niya, inaasahan nilang ang mga natutunan sa training na ito ay agad na maisasabuhay ng mga kawani sa kanilang mga trabaho upang mas mapataas ang kalidad ng serbisyo publiko sa Bayambang.
Sa pagtatapos, ang mga kawani ng munisipyo ay nagpahayag ng kanilang pasasalamat sa lokal na pamahalaan sa pagbibigay ng ganitong oportunidad na makapagdagdag ng kanilang kaalaman at kasanayan. (Charlaine T. Melendez, VMF/RSO; AG)
