Nagtagisan ng galing ang mga tsikiting sa talent portion ng Little Mr. and Ms. Bayambang 2024, kung saan ipinapamalas ng mga bibong contenders ang kanilang mga natatanging kakayahan at galing sa iba’t ibang larangan, noong ika-15 ng Marso, 2024, sa Balon Bayambang Events Center.
Sa event na ito na inorganisa ni Municipal Administrator, Atty. Rodelynn Rajini S. Vidad, hindi nagpahuli ang mga contender sa pagpapamalas na kani-kanilang angking talento, mula sa pag-awit, modern dance, folk dance, pagsalaysay ng tula, drama, at acting na nagbigay aliw sa mga manonood.
Tuwang-tuwa na sinuri at minarkahan ng mga hurado ang cute na cute na performance ng mga bata. Ang mga hurado ay sina Miss Malasiqui 2024 Jenesse Viktoria Mejia, Rotary Club Bayambang President Samuel Lomboy Jr., Dr. Bing C. Diola, Ms. Lyra Pamela Duque, at SFInsp Divine Cardona.
Sa kabila ng pagningning ng kahanga-hangang talento ng mga munting kabataan sa iba’t-ibang larangan, ang patimpalak ay nagbigay-daan sa lokal na pamahalaan upang maipakita ang pagpapahalaga nito sa kanila bilang mga miyembro ng susunod na henerasyon ng bayan.
Ang mga nagwagi ay malalaman sa araw ng pageant sa darating na April 3.
(ni Khim Ambrie L. Ballesteros, Angelica C. Arquinez/RSO; larawan: Ace Gloria)
