Ang regular meeting ng Local School Board (LSB) ay ginanap noong October 30, 2024, sa Municipal Conference Room (MCR) upang ipagpatuloy ang pagpaplano para sa susunod na taon.
Isa sa mga patuloy na tinatalakay ay ang paghahanda ng budget para sa 2025 Special Education Fund (SEF). Pinagpaplanuhan na makapaglaan ng Php1 milyon mula sa SEF budget upang magamit sa pagpapatayo ng isang bagong silid-aralan sa Don Teofilo Elementary School. Ito ay isang mahalagang proyekto upang masigurong may sapat na espasyo para sa pagkatuto ng mga mag-aaral.
Bukod dito, pinag-usapan din ang paglulunsad ng inisyatibong “Buklat Aklat.” Ang programang ito ay naglalayong mapabuti ang kakayahan sa pag-unawa sa binabasa ng mga mag-aaral. Sa pamamagitan ng iba’t ibang aktibidad at programa, inaasahang magiging mas masigasig ang mga estudyante sa pagbabasa at pag-aaral.
Tinalakay rin ang 2024 Year-End Accomplishment Report upang masuri ang mga nagawa ng LSB sa nakalipas na taon. Ang pagsusuri sa mga datos tungkol sa dropout rate ay isang mahalagang bahagi ng pagpupulong upang makahanap ng mga solusyon sa problemang ito.
Inaasahan na ang mga desisyon at plano na ginawa sa pagpupulong na ito ay magkakaroon ng malaking epekto sa pagpapaunlad ng edukasyon sa Bayambang. Sa pamamagitan ng paglalaan ng sapat na pondo at pagpapatupad ng mga makabagong programa, mas mapapabuti ang kalidad ng edukasyon na natatanggap ng mga mag-aaral.
(Angel P. Veloria; photos: APV)
