Dumagsa ang mga residente sa programang “Your Name, Your Right” noong Marso 4, 2026 sa Brgy. Hermoza, kung saan nagtipon ang mga opisyal ng barangay, mga magulang, kabataan, at senior citizens upang makinabang sa libreng serbisyong sibil na inilapit mismo sa komunidad.
Ipinakita ng mataas na turnout ang buong suporta ng publiko sa mga programang nagbibigay-linaw sa mga usaping legal at dokumentasyon.
Pinangunahan ni Punong Barangay Frankie Catalan ang pagbubukas ng aktibidad. Nagbigay naman ng mensahe si Gng. Rose Marie Opina, kinatawan ng Hermoza National School, na nagpapaalala sa kahalagahan ng tamang rekord at pagkakakilanlan sa pagkuha ng serbisyo at oportunidad.
Samantala, masusing ipinaliwanag ni Municipal Civil Registrar Ismael D. Malicdem Jr. ang mahahalagang batas at proseso sa civil registration, pati ang pinakabagong mga abiso mula sa Philippine Statistics Authority (PSA).
Hindi lamang talakayan ang naging laman ng programa—serbisyo agad ang pangunahing tampok para sa mga residente. Kabilang sa mga naihatid na tulong ang:
• Late registration ng kapanganakan, kasal, at kamatayan
• BRAP assistance
• Correction of entries
• Pagkilala ng ama sa anak
• Paggamit ng apelyido ng ama ng non-marital child
• Legitimation
• Supplemental reports
• Rehistrasyon para sa libreng Kasalang Bayan
Bilang dagdag na tulong, 109 residente ang naisabay sa data capture para sa upgraded Community Service Card katuwang ang ICTO. Layunin nitong mapadali ang pag-access sa tulong pinansyal sa pamamagitan ng partnership ng LGU at GCash, upang mas mabilis at mas maayos na maihatid ang suporta sa mga nangangailangan.
Sa huli, malinaw ang mensahe ng aktibidad: kapag ang serbisyo ang lumalapit sa tao, mas maraming Bayambangueño ang natutulungan—mabilis, maayos, at walang naiiwan. (LCRO; LCRO)
