Pormal na tinanggap ng LGU-Bayambang ang parangal na “BEYOND COMPLIANT” Gawad KALASAG Seal sa ginanap na Special Awards for Excellence in Disaster Risk Reduction and Management and Humanitarian Assistance Ceremony noong December 17, 2024 sa Vista La Vita, San Vicente, San Fernando City, La Union.
Sa pangunguna ng ating butihing MDRRMC Chairperson, Hon. Mayor Niña Jose-Quiambao, malugod na tinanggap ni LDRRMO Genevieve N. Uy at ilan sa kanyang kawani ang mataas na pagkilala mula sa Office of the Civil Defense.
Kabilang ang bayan ng Bayambang sa 173 na nanguna sa 1,642 na bayan at lungsod sa buong Pilipinas na pinarangalan ng “Beyond Compliant.”
Sa tala ng Region 1, na mayroong 215 na bayan at lungsod, 23 lamang ang “Beyond Compliant,” at mula sa 48 na bayan at lungsod ng Pangasinan, 10 lamang ang napabilang sa nasabing parangal.
Isa na nga rito ang bayan ng Bayambang, na may rating na 2.65 kung saan 3.0 ang pinakamataas na rating.
Patuloy ang pagkilala ng national government sa mga maagap na output at inisyatibo ng bayan sa naturang larangan.
Sa nakalipas na tatlong taon, ang Bayambang ay nakatanggap ng “Fully Compliant” sa taong 2023, “Beyond Compliant” sa taong 2022, at “Fully Compliant” sa taong 2021.
Ang “BEYOND COMPLIANT” na rating ay nangangahulugan na ang isang bayan ay NAHIGITAN ANG ITINAKDANG MGA PAMANTAYAN sa establishment at functionality ng Local DRRM Councils at Local DRRM Offices na itinakda sa ilalim ng batas ng Republic Act 10121.
Ang parangal ay inabot ni Regional Director Laurence Mina ng Office of the Civil Defense Region 1, kasama sina Director Eugenio Gepte Jr. ng Civil Defense and Disaster Management Training Institute of Office of the Civil Defense DND, Regional Director Marie Angela Gopalan ng DSWD Region 1, Assistant Regional Director Paulino Lalata Jr. ng DILG Region 1, at Ms. Raquel Atawe ng NEDA Region 1.
Ang bayan ng Bayambang ay nagpapasalamat sa Office of the Civil Defense sa nabanggit na pagkilala. (MDRRMO/RSO; MDRRMO)
