Kasalukuyang isinagawa ang tatlong araw na Pre-Construction Conference para sa proyektong Road Opening and Concreting of San Gabriel II–Pantol Farm-to-Market Road sa Mayor’s Conference Room ng Bayambang.
Pinangunahan ito ng Department of Agriculture–Philippine Rural Development Project (PRDP) Scale Up sa pamamagitan ng National Project Coordination Office, Project Support Office–North Luzon Cluster, at Regional Project Coordination Office I, sa pakikipagtulungan ng Pamahalaang Bayan ng Bayambang.
Layunin ng kumperensiya na ihanda ang lahat ng kasapi na ahensiya, kontratista, at mga opisyal ng LGU bago ang pagsisimula ng konstruksyon upang matiyak na magiging maayos, organisado, at naaayon sa itinakdang pamantayan ang pagpapatupad ng proyekto.
Sa loob ng tatlong araw, tinatalakay ang mga mahahalagang usapin tulad ng mga tungkulin at responsibilidad ng bawat katuwang sa proyekto, iskedyul ng konstruksyon, mga kinakailangang dokumento, sistema ng pagmomonitor at pag-uulat, mga pamantayan sa kalidad ng trabaho, kaligtasan sa konstruksyon, pangangalaga sa kapaligiran, at tamang proseso ng koordinasyon at pagbabayad.
Nagkakaroon din ng pagsasanay sa paggamit ng geotagging technology at citizen monitoring tools upang higit na mapalakas ang transparency at partisipasyon ng komunidad sa pagsubaybay sa proyekto.
Binibigyang-diin din ang kahalagahan ng maagap na koordinasyon sa pagitan ng LGU, kontratista, at mga benepisyaryo upang matiyak ang maayos na implementasyon ng imprastraktura.
Sa pamamagitan ng kumperensiyang ito, inaasahang magiging mas episyente ang pagpapatupad ng proyektong farm-to-market road na magpapadali sa transportasyon ng mga produkto at magbibigay ng mas magandang akses sa mga magsasaka at residente ng Bayambang. (RSO; JMB)
