Ang National Simultaneous Earthquake Drill (NSED) para sa unang quarter ng taon ay ginanap ngayong araw, March 13, 2025, at minarkahan ng isang matagumpay na pagsasanay sa pagtugon sa simulated na insidente ng lindol.
Ang pagsasanay ay pinangunahan ng MDRRMO sa pamumuno ni LDRRMO Gene N. Uy, sa pakikipagtulungan sa mga ahensiya ng BFP, PNP, Engineering Department at BPSO, upang matiyak ang kahandaan ng komunidad sa anumang posibleng sakuna.
Hindi lamang ang mga ahensya ng gobyerno ang nakilahok, sapagkat nakiisa rin ang mga pampubliko at pampribadong paaralang pang-elementarya at high school, lahat ng daycare center, at iba’t ibang mga opisyal mula sa 77 na barangay ng Bayambang.
Sa tulong ng mga nakatalagang Safety Officer ng bawat departamento, kasama rin sa pagsasanay ang mga empleyado ng LGU-Bayambang, na nagpapakita ng malawak na saklaw ng paghahanda.
Ang regular na pagsasanay sa earthquake drill ay mahalaga hindi lamang para sa pag-alam sa mga tamang hakbang sa panahon ng lindol, kundi pati na rin para sa pagpapababa ng antas ng insidente ng panic sa publiko.
Sa pamamagitan ng paulit-ulit na pagsasanay, nagkakaroon ng kamalayan ang mga mamamayan sa mga dapat gawin, na nagreresulta sa mas maayos at mas ligtas na pagtugon sa panahon ng tunay na pagyanig.
Ang pagsasaayos ng grupo ng mga tagapagresponde sa panahon ng sakuna ay malaking parte sa pagiging alerto at handa, na siyang susi sa kaligtasan ng buhay at pagbabawas ng pinsala sa ari-arian, at ang pagsasanay at pagpapakalat ng kaalaman ay tiyak na magiging susi sa pagbuo ng isang mas ligtas at mas matibay na komunidad. (VMF/RSO; JMB, MDRRMO, various agencies)
